MJEMA BLOG

JICHO LA MWANDISHI

  • RSS
  • Delicious
  • Digg
  • Facebook
  • Twitter







Na Dixon Busagaga,Moshi.
POLISI mkoani Kilimanjaro imefanikiwa kunasa mtandao wa watu wanaodaiwa kujihusisha katika matukio mbalimbali ya unyang’anyi na uporaji wa kutumia silaha za moto ya hivi karibuni baada ya kumkamata mtuhumiwa mwingine na kufanya idadi yao kufikia watano sasa. 


Mbali na kukamatwa kwa mtuhumiwa huyo pia polisi wamefanikiwa kukamata bastola aina ya Browning yenye namba 0663 TZ CAR 75516 pamoja na risasi moja ya bastolailiyotambuliwa kuwa ni mali ya Evance Masuki(54)mkazi wa Majengo mjini Moshi iliyoporwa na watuhumiwa hao October 12 mwaka huu. 


Kamanda wa Polisi mkoa wa Kilimanjaro Robrty Boaz alisema katika uchunguzi wa kina ikiwa ni pamoja na kuwahoji watuhumiwa ,watu hao walikubalia kuonyesha silaha hizo pamoja na risasi tatu za Shortgun ambayo inadaiwa kuhusika katika mauaji ya mfanyabiashara wa mbao mjini hapa Nickson Mushi. 


“Katika hatua za uchunguzi tumebaini kuwepo uhusiano na ushiriki wa silaha aina ya shortgun katika mauaji ya mfanyabiashara Nickson Mushi aliyeuawa huko maili sita Novemba tisa mwaka huu ambayo tunaifanyia uchunguzi wa kitaalamu.”alisema Boaz.


Boaz alisema pia wamefanikiwa kukamata komputa mpakato nyingine aina ya Toshiba ambayo iliibwa hivi karibuni toka kwenye duka liitwalo Pendeza mini super market mali ya William Mwacha mkazi wa mjini Moshi. 


Kamanda Boaz aliwataja watuhumiwa waliokamatwa kuwa ni pamoja na Emanuel Makala(280 maarufu kama Rama,Seif Hussein(42)maarufu kama Mwamba ,Eben Mwaipopo(22)maarufu kama Hashimu,Nicolaus Urio(28) na Emmanuel Kiula(28) wote wakazi wa Moshi. 


Boaz alitoa wito kwa wananchi waendelee kiimarisha vikundi vya ulinzi katika maeneo yao pamoja na kuwa wepesi wa kutoa taarifa za siri za aharifu na uharifu kwa jeshi la polisi ili hatua ziweze kuchukuliwa mapema kabla ya madahara kutokea. 


Katika siku za karibuni katika mji wa Moshi na mikoa ya jirani kumekuwa na matukio kadha wa kadha ya unyang’anyi na uharifu wa kutumia silaha ambapo miongoni mwa vitu ambavyo vimekuwa vikiporwa ni pamoja na Laptop,Simu pamoja na fedha. 


Juzi kaimu kamanda wa Polisi mkoani hapa, Koika Moita, aliwaambia waandishi wa habari baadhi ya vitu vilivyokutwa kwa watuhumiwa hao wa ujambazi ni pamoja na gari aina ya Toyota Mark II yenye namba T 564 AUW ambalo linaaminika kutumika katika kufanyia uharifu.  


Vitu vingine ambavyo walikutwa navyo watuhumiwa hao mbali na bunduki aina ya Shrtgun pia walikutwa na laptop mbili aina ya Dell na Hp ambazo  taarifa zinasema ziliporwa katika moja ya maduka yaliyopo jengo la Kibo tower mjini hapa. 

Watuhumiwa hao pia walikutwa na vibao vitatu vya namba za gari (Plate number) ambazo ni T916 ARK,vibao viwili na T885 AZW ambavyo vinadaiwa kutumika mara wafanyapo tukio la uharifu kwa lengo la kujificha kunaswa na askari. 


Pia watu hao walikutwa na funguo mbalimbali za magari,Simu nane za aina mbalimbali ,vocha za mitandao mbalimbali ya simu ambazo thamani yake haikuweza kufahamika mara moja pamoja na vifaa mbalimba vinavyoaminika kutumika katika  kuvunjia vikiwemo bisibisi
,Nyundo,Prize  pamoja na Tindo .


Moshi. Shahidi wa 15 wa upande wa mashitaka, Maulid Hamisi, jana aliieleza mahakama namna walivyokamata Wanyampori hai wakiwemo Twiga wanne waliotoroshwa kwenda Uarabuni. Twiga hao na wanyama wengine walitoroshwa kwenda Doha nchini Qartar Novemba 26,2010 kupitia uwanja wa ndege wa kimataifa wa Kilimanjaro (Kia) kwa kutumia ndege kubwa ya Jeshi la Qatar. Shahidi huyo aliiambia mahakama jana chini ya hakimu mkazi mfawidhi,Simon Kobelo kuwa wanyama hao waliwakamata maeneo ya mto wa Mbu,Elboreti na Engaruka wilayani Monduli. Akiongozwa kutoa ushahidi wake na wakili wa Serikali mwandamizi, Evetha Mushi, shahidi huyo alidai akiwa na bosi wake ambaye ni mshitakiwa wa kwanza,Kamran Ahmed walikamata Twiga wanne. “Wale Twiga wanne wa mwanzo na Wanyama wengine kama Swala, Pofu na Nyumbu tuliwasafirisha na kuwahifadhi katika zizi la Kamrani lililopo pale Kwarefu (Arusha)”alisema Hamisi. Hata hivyo wakiwa katika hilo zizi Twiga watatu na wanyama wengine nao walikufa ambapo mshitakiwa wa kwanza aliwaelekeza wakakamate Twiga na wanyama wengine ili kujazia waliokufa. Shahidi huyo alisema walirudi tena porini na kukamata Twiga wengine watatu na wanyama wengine na kuwasafirisha hadi kwenye zizi hilo la wanyama wakisubiri kusafirishwa kwenda nje ya nchi. Alisema Novemba 25,2010 waliagizwa na Kamran kuwaandaa wale wanyama na baadae wakiwa wanaendelea na kazi walikuja watu wanane na kuelezwa kuwa saba kati yao ni marubani wa ndege. Zoezi la kuwaandaa wanyama hao liliendelea hadi saa 9:00 alfajiri ya Novemba 26, ambapo walianza safari kuelekea KIA wakiwa wanafuatana na magari mengine yaliyokuwa yamewabeba wale marubani. Kwa mujibu wa shahidi huyo, baada ya kufikia KIA, milango ilifunguliwa na magari yote manne yakiwemo malori mawili aina ya Mitsubish Fusso yaliyobeba wanyama yaliingia eneo la uwanja. Baadae kazi ya kushusha mabox yaliyokuwa na wanyama ilianza na baadae yalipakizwa katika ndege kubwa ya Jeshi la Qatar ikisimamiwa kwa pamoja na Kamran na marubani wa ndege hiyo ya Jeshi. Alisema wakati kazi ya kupakia wanyama hao ikiendelea, alimuona mshitakiwa wa tatu, Martin Kimath wakijadiliana jambo uwanjani hapo lakini hakuweza kusikia walikuwa wanazungumza nini. Kwa mujibu wa shahidi huyo, baada ya kazi ya kupakia wanyama hao kukamilika, yeye, bosi wake (mshitakiwa wa kwanza) na wafanyakazi wengine walirudi Jijini Arusha kuendelea na kazi nyingine. Alisema baada ya wiki mbili, Kamran aliwaagiza waende tena porini kukamatwa wanyama wakiwemo Twiga ili kujazia wale ambao walisafirishwa na walifanikiwa kukamata Twiga mmoja. “Tulipomfikisha kwenye zizi Yule Twiga alikuwa hawezi kusimama na kesho yake alikufa na hali kama hiyo iliendelea kwa wanyama wengine wadogo hadi zizi likabaki bila wanyama”alisema shahidi huyo. Shahidi huyo alisema mara mbili Twiga hao walipokufa, madaktari kutoka Taasisi ya Utafiti wa Wanyamapori (Tawiri) walikuwa wakifika na kuwapasua kisha kuwaelekeza wawazike. Washitakiwa katika kesi hiyo ya uhujumu uchumi ni pamoja na raia wa Pakistan, Kamran Ahmed, Hawa Mang’unyuka, Martin Kimath na Michael Mrutu ambao wote wako nje kwa dhamana. Wanyama waliotoroshwa kwenda Doha wenye thamani ya Dola 113,715 za Marekani sawa na Sh170.5 milioni za Tanzania, walisafirishwa Novemba 26,2010 kupitia uwanja wa ndege KIA.

at Friday, November 22, 2013 Posted by Daniel Mjema 0 Comments



Na Mwandishi wetu.


Kijana Ayubu Mnazi Alphonce(24)ambaye amelazwa katika hospitali ya Rufaa ya mkoa wa Tabora Kitete akipatiwa matibabu baada ya kuamua kujikata uume wake kwa kitu alichodai kuwa ni wembe mpya,sababu za kufanya hivyo Ayubu alieleza kuwa inatokana na usumbufu anaoupata kutoka kwa wanawake ambao amekuwa ana uhusiano nao wa kimapenzi.


MKASA KAMILI:Ayubu ambaye kwasasa amelazwa wadi namba moja katika hospitali hiyo,imeelezwa kuwa baada ya kutokea mfarakano baina yake na mwanamke mmoja ambaye jina halijafahamika aliamua kuingia ndani na kuukata uume wake kwa kutumia wembe mkali na baadae sehemu ya uume huo alikwenda kuutupa kwenye majani na kurudi chumbani kwake.


Taarifa kutoka Jeshi la Polisi zinaeleza kuwa baba  mzazi wa Ayubu baada ya kubaini mtoto wake kuwa amejifungia chumbani kwa muda mrefu akaamua kumgongea mlango na alipopata fursa ya kuingia ndani ndipo akagundua ukweli juu ya jambo hilo na hivyo kumpeleka Ayubu Kituo kikubwa cha Polisi Tabora ambapo jalada la kesi ya kujidhuru lilifunguliwa.


Hata hivyo hali ya Ayubu kwasasa inaendelea vizuri licha ya kuwa amejikata na kubakisha kipande cha sentimeta 5 huku akisubiriwa kufikishwa mahakamani kwa kutenda kosa hilo la kujidhuru mwenyewe pasipo sababu za msingi

ASEMA NI MCHEZO MCHAFU WA KISIASA

Mbunge wa Urambo Magharibi mkoani Tabora, Profesa Juma Kapuya amejitokeza hadharani na kukanusha vikali taarifa za kumbaka mtoto Yatima. Soma taarifa yake kwa wanahabari hapa chini.

Ndugu wanahabari,
Baada ya kumshukuru na kumtukuza mwenyezi Mungu mwingi wa rehema. Natanguliza salamu zangu za pole kwa familia ya marehemu mwanazuoni na mwanaharakati mwenzangu Dkt Sengondo Mvungi aliyetangulia mbele ya Haki siku chache zilizopita huko Afrika ya kusini.
Ndugu zangu wanahabari,
Wengi mnanifahamu na kuifahamu vema historia yangu katika utendaji kazi na utumishi wa umma wa Watanzania. Nimekuwa nikiitumikia nchi yangu kwa kipindi kirefu katika Nyanja na sekta mbali mbali kuanzia Darasani mpaka kwenye siasa.
Kwa msingi huo, mimi Profesa Juma Kapuya, siku zote ninajikuta mwenye wajibu endelevu wa kuendelea kulitumikia Taifa langu kila siku mpaka kufikia mwisho wa Nguvu zangu.
Ndugu wanahabari,
Hivi karibuni nikiwa huku jimboni kuendelea na shuhuli za utekelezaji wa ilani ya chama cha mapinduzi kumezuka Tuhuma kadhaa zilizoelekezwa dhidi yamgu zikiasisiwa na wanasiasa wenzangu wa ndani na nje ya chama changu ili kudhoofisha juhudi na utendaji wangu wa kila siku.
Tuhuma hizo zisizokuwa na kichwa wala miguu na pia kutokuwa na ukweli wowote, wamekuwa wakizitoa kwa kumtumia msichana anayedai amefanyiwa vitendo visivyofaa na mimi. Mimi simfahamu na sijui hizi shutuma zinatokea wapi.
Ndugu wanahabari,

Kwa tamko hili ninapenda kuwaambia kuwa nimefedheheshwa sana na uwezo mdogo wa kisiasa unaofanywa na hawa watu kwa kuwa dhamira yao haitatimia. Napenda niwakumbushe ndugu zangu kwamba tunaelekea kwenye uchaguzi mkuu wa mwaka 2015 na wapinzani wangu wameanza kunichafua ili nionekane sifai.
Ninapenda kuwaambia watanzania na wananchi wa jimbo langu kuwa wanatakiwa wazipuuze taarifa hizi kwa kuwa hazina ukweli wowote na kwamba ni za kutungwa zenye lengo la kunidharirisha na kuniondolea heshima yangu niliyojijengea kwenye jamii kwa kipindi kirefu sasa. Waswahili wanasema dawa ya mjinga ni kumpuuza
Na hili linajidhihirisha zaidi kwa habari hii kuandikwa na chombo kimoja tu cha habari kinachotumiwa na chama kimoja cha siasa na baadhi ya wanasiasa wa chama changu wasiokitakia heri chama chetu, naomba kuwashukuru na kuwapongeza vyombo vingine vya habari kwa umakini wenu wa kuwa na nauelewa wa kutoandika kitu bila kukifanyia uchunguzi na kubaini ukweli ulivyo.

Chombo hiki cha habari kiliwahi kuripoti mwaka jana kuwa kuna mitambo imeingizwa nchini inayoweza kuandika ujumbe na kisha kuufanya uonekane umetoka kwenye namba Fulani, kwa kipindi kile sikuwaelewa, lakini sasa ninawaelewa na nimewaona kuwa wako sahihi na wao ndio waliouingiza mtambo huu na sasa wameamua kuutumia dhidi yangu kwa kutengeneza meseji na kuzihusianisha na mimi. Ninaamini ukweli utawaumbua muda si mrefu.
Ndugu wanahabari,
Nimeijenga heshima yangu na familia yangu kwa jamii yangu kwa kipindi kirefu mno, kwa hivyo siwezi kuruhusu heshima niliyoijenga kwa miongo kadhaa karibiwa na kupotezwa na watu wachache tena kwa muda mfupi namna hii.
Hivyop basi nimechukua hatua za kisheria kuhakikisha heshima yangu inaendelea kulindwa na utu wangu unaheshimiwa.
Nimemwagiza mwanasheria wangu afungue kesi na tayari amewashitaki watu wote wanaohusika kwenye mpango huu na tayari wameshapokea taarifa ya kuitwa mahakamani.
Nitaendelea kuwachukulia hatua kali za kisheria watu wote watakaoendelea kutaka kujipatia umaarufu ama wa kisiasa au wowote ule kwa kutumia jina langu.
Hayo yote ni kwa kuzingatia ukweli kwamba nchi yetu inaendeshwa kwa misingi ya kisheria na kufuata na kuheshimu haki na wajibu wakila mmoja wetu.
Kwenye hilo ninawaambia ‘’janja yao nimeigundua, na hawatafanikiwa’’
Ninatoa Rai kwa yeyote mwenye kuona hilo jambo lina ukweli alipeleke kwenye vyombo husika ili lishuhulikiwe kwa mujibu wa sheria na sio kutumia vyombo vya habari kuchafuana.
Mwisho ninasisitiza kuwa nitaendelea kuilinda na kuitetea heshima yangu niliyojijengea kwa jamii kwa muda mrefu sasa na sitaruhusukuiona ikiharibiwa na wajanja wachache kwa maslahi yao binafsi.
Tuendelee kuijenga nchi yetu,
Mungu Ibariki Tanzania

Imetolewa leo tarehe 15.11.2013 nami
Prof. Juma A.Kapuya
Mbunge – urambo magharibi
S.L.P 45 Kaliua Tabora
Simu 0784993930



ALIYEKUWA AKITOA MIMBA NA ANAYETOLEWA WOTE WABURUZWA MAHAKAMANI

Ripota Wetu,Moshi

Daktari mstaafu wa hospitali ya Serikali ya mkoa Kilimanjaro ya Mawenzi, Dk. Francis Shayo (56)amefikishwa mahakamani kwa tuhuma za kumtoa mimba mwanafunzi mwenye umri wa miaka 19.

Mwanafunzi huyo wa shule ya sekondari ya Komkwa Masama wilayani Hai, Irene Massawe naye ameunganishwa katika kesi hiyo namba 528/2013 iliyofunguliwa jana akiwa mshitakiwa wa tatu.

Washitakiwa wote watano walifikishwa mbele ya Hakimu Mfawidhi wilaya ya Moshi, Ruth Mkisi na kupekwa rumande gereza la Karanga mjini Moshi baada ya kushindwa kutimiza masharti ya dhamana.

Mshitakiwa wa kwanza katika kesi hiyo ni Dk. Shayo na wa pili akiwa ni Peter Mwanga (50) ambaye  anatuhumiwa kushiriki katika njama na mipango ya utoaji mimba hiyo ya mwanafunzi.

Kulingana na hati ya mashitaka,mshitakiwa wa tatu ni Irene, wanne ni Beatrice Urassa (36) na Rose Uronu (38) ambao kwa pamoja ukimuondoa Dk. Shayo wanatuhumiwa kula njama kutenda kosa hilo.

Wakili wa Serikali , Nasir Kassim anayeendesha kesi hiyo, alidai katika siku, tarehe na saa isiyojulikana washitakiwa wote watano walikula njama ya kutenda kosa la kutoa mimba kinyume cha sheria.

Katika shitaka la Pili linalomhusu Dk. Shayo pekee, wakili Kassim alidai Novemba 5 mwaka huu, mshitakiwa alijaribu kumtoa mimba mwanafunzi huyo kitendo ambacho ni kinyume cha sheria.

Shitaka la tatu linamhusu Irene pekee ambaye anashitakiwa na Jamhuri kwa kutoka kutoa mimba hiyo huku akifahamu kuwa kwa kufanya hivyo ni kosa la jinai chini ya kanuni ya adhabu.

Washitakiwa wote wamekanusha mashitaka hayo ambapo wakili Kassim alisema upelelezi wa kesi hiyo umekamilika ambapo Hakimu Mkisi alipanga Novemba 26 kama siku ya usikilizwaji wa awali.

Kwa picha za namna walivyokamatwa rejea picha zilizotangulia.


at Saturday, November 16, 2013 Posted by Daniel Mjema 0 Comments



 Washitakiwa kwa unyang'anyi wa kutumia silaha

Ripota Wetu,Moshi

Watu wawili wanaotuhumiwa kumteka nyara mwanamke wa Moshi,Asha Amin na kumpora Dola 11,000 za Marekani sawa na Sh18 milioni wamefikishwa kortini kwa unyang’anyi wa kutumia silaha.

Mshitakiwa wa kwanza Deo Mugassa
Wakati watuhumiwa hao wakifikishwa mahakamani juzi, Jeshi la Polisi limesema bado linawasaka watuhumiwa wengine wawili akiwamo kiongozi mmoja wa kisiasa kuhusiana na tukio hilo.

Waliofikishwa mbele ya Hakimu mkazi mkoa Kilimanjaro, Theotimus Swai ni Deo Mugasa (38) mkazi wa Jijini Dar Es Salaam na Gasper Urassa (37) mkazi wa mji wa Bomang’ombe wilayani Hai.

Akiwasomea mashitaka,wakili wa Serikali, Patrick Mwita alidai mahakamani katika siku na sehemu isiyojulikana, watuhumiwa walikula njama ya kutenda kosa la unyang’anyi wa kutumia silaha.

Katika shitaka la pili, ilidaiwa kuwa Oktoba 11,2013 huko Soweto NHC mjini Moshi, watuhumiwa walimpora Asha Amin Dola 11,000 (Sh18 mili) baada ya kumtishia kwa silaha aina ya bastola.

Watuhumiwa walikana mashitaka hayo na wamerejeshwa rumande hadi Novemba 27 kesi yao itakapotajwa tena kwa kuwa mashitaka ya unyang’anyi wa kutumia silaha hayana dhamana kisheria.

Katika hatua nyingine, Kamanda wa Polisi mkoa Kilimanjaro, Robert Boaz alisema polisi wanaendelea kuwasaka watu wengine (majina yamehifadhiwa) kwa tuhuma za kuhusika katika tukio hilo.

Mwanamke huyo alichukuliwa na watu waliojitambulisha kuwa ni askari wa upelelezi kutoka Jijini Dar Es Salaam wakidai  wametumwa kumkamata kwa tuhuma za kuuza dawa za kulevya.

Kamanda Boaz alisema watu hao walimwachia huru mwanamke huyo siku hiyo hiyo saa 4:00 usiku katika eneo la Bunju Jijini Dar Es Salaam bila kumdhuru na kumpa Sh50,000 za nauli.

Mwili wa mwanamke ukiwa chini ya gari aina ya Fuso muda mfupi baada ya Kugongwa.

Mashuhuda wa Ajali.



Mwili wa Marehemu ukiwa umefunikwa.

Baada ya saa moja tangu kutokea ajali gari la kuinua vitu vizito (Winchi)toka Kanan transport lilifika.

Whinchi likiinua gari aina ya Fuso kwa ajili ya kuutoa mwili wa marehemu.

Mwili wa Marehemu ukiwa umetolewa chini ya gari.

Moja kati ya pikipiki mbili zilizogongwa katika eneo hilo kama inayoonekana ikiwa imeharibika vibaya.



Moshi.

MWANAMKE mmoja aliyefahamika kwa jina la Severina Anthony mkazi wa KCMC amefariki dunia papo hapo baada kugongwa na gari aina ya Fuso lenye namba za usajili T 209 AHA ambalo liliacha njia kisha kugonga pikipiki mbili na kujeruhi watu wengine wawili.


Tukio hilo limetokea jana majira saa 12:15  katika mtaa wa Market jirani kabisa na mgahawa wa Fresh Coach huku mwili wa marehemu huyo ikishuhudiwa ukiwa umegandamizwa chini ya gari hilo kwa takribani saa 1 kutokana na kukosekana kwa vifaa vya uokoaji.


Kwa mujibu wa mmoja wa shuhuda wa tukio hilo Robert Moshi Limwagu ameiambia clouds fm kuwa mwanamke huyo alikuwa akitoka katika shughuli za kibiashara katika moja ya soko lililopo mjini  Moshi na kwamba mauti ya limfika muda mchache baada ya kufika kumsalimia rafiki yake ambaye anafanya biashara katika eneo hilo.

 

Hata hivyo baadhi ya mashuhuda wameonekana kusikitishwa na hali ya kukosekana kwa msaada wa haraka hususani gari maalumu la kunyanyulia magari maarufu kama Breack Down hali iliyosababisha marehemu kukaa katika eneo hilo kwa zaidi ya saa 1.
 

Kamanda wa polisi mkoa wa Kilimanjaro Robert Boaz amethibitisha kutokea kwa ajali hiyo huku akiwataja wengine walijeruhiwa katika ajali hiyo kuwa ni Evarist Kavishe na Cantona Joseph ambao wote wamelazwa katika hosptali ya rufaa ya KCMC wakipatiwa matibabu.

Boaz amesema chanzo cha ajaili hiyo ni uzembe wa dereva Emanuel Kimari ambaye anadaiwa kuendesha gari akiwa amelewa na kwamba tayari jeshi hilo linamshikilia kwa hojiano zaidi.

 
Mwisho.